Бүгін Астанада өткен Қазақстан мұсылмандарының Х Құрылтайында ҚМДБ Төрағасы, Бас мүфти лауазымына Наурызбай қажы Тағанұлының кандидатурасы ұсынылды. Құрылтайға жиналған 300-ге жуық делегат осы кандидатураға бірауыздан дауыс беріп, қолдау көрсетіп, Наурызбай қажы Тағанұлын Бас мүфти лауазымына қайта сайлады. Бұл туралы www.muftyat.kz хабарлады.

ҚМДБ Төрағасы, Бас мүфти Наурызбай қажы Тағанұлы журналистерге берген сұхбатында: «Құрылтайға еліміздің әр облысынан келген 300-ге жуық делегат менің кандидатурама дауыс беріп, сенім білдіріп, Бас мүфти лауазымына қайта сайлады. Бұл сенімді абыроймен ақтауға бар күш-жігерімді жұмсаймын. Жоспарлап отырған бірқатар жұмыстарымыз бар. Мәселен, алдағы 2025 жылы Қазақстан мұсылмандары діни басқармасының дербес мүфтият болып құрылғанына 35 жыл толады. Мерейтой аясында жоспардағы көптеген игі істерді жұрт болып жұмылып, халық болып бірігіп атқаруға баршаңызды шақырамын» деді. Наурызбай қажы Тағанұлы ҚМДБ Төрағасы, Бас мүфти лауазымына екінші рет сайланып отыр.

Нұр-Мүбарак университеті ҚМДБ Төрағасы, Бас мүфти Наурызбай қажы Тағанұлын жаңадан сайлануымен құттықтап, еліміздің ислам саласындағы абыройын арттырып, дамытуда күш-жігер, тың идеялар мен толассыз таудай табыстар тілейді! Өзіңіз жетекшілік ететін ұжымға ынтымақ пен бірлік, отандық діни білім мен ғылым саласының өркендеуі мен дамуындағы қызметтеріңіз жемісті де жеңісті болғай.

Мейірімді Алла зор денсаулық, отбасыңызға амандық, қызметіңізде де екі дүниелік абыройға бөлегей!