ҒАЛЫМ ҰСТАЗДАР СТУДЕНТТЕРГЕ ЖЕТІСТІКТЕРІНІҢ ҚҰПИЯСЫМЕН БӨЛІСТІ

Нұр-Мүбарак университетінің бірінші курс студенттеріне «Менің жетістігім – менің нәтижем» атты ғалымдармен кездесу өтті. Шетел филологиясы және аударма ісі кафедрасы ұйымдастырған шарада мысырлық ғалым PhD доктор Уалид Ибрагим Хасан Ибрагим мен арабтанушы-ғалым, аудармашы, араб қолжазба маманы PhD доктор Құрманғазы Садыбаев жетістікке жетудің құпияларымен бөлісті.

Семинарда алғы сөз сөйлеген проректор PhD доктор Ершат Оңғар студенттерге ақыл-кеңесін айтып, университет қабырғасындағы 4 жылдық мүмкіндікті тиімді пайдалануға шақырды. Модератор, филол.ғ.к. Шолпан Қожабекова спикерлерді таныстырып, олардың таңдалуының маңыздылығына тоқталды. 

Мысырдағы әл-Азһар университетінің еліміздегі ең алғашқы PhD түлегі, НМУ-дің аға оқытушысы Құрманғазы Тұрмаханұлы «Нәтиже мен табысқа жету жолындағы сенің еркің» тақырыбында сөз тарқатып, бастаған істе нәтижелі болудың негізгі шарттарын атап өтті. Ал мысырлық оқытушы PhD доктор Уалид Ибрагим Хасан «Тіл мен мәдениеттің ауызшадан жазбаға өту фәлсафасы» тақырыбында тіл үйренудің құпияларын ашып көрсетті. 

ШФАІ кафедрасының меңгерушісі Гүлдархан Рысбаева ҚР Ғылым және жоғары білім министрлігінің тапсырысы аясындағы «Менің жетістігім – менің нәтижем» басқосуы жоғары деңгейде өткенін атап өтті. Ол жастардың ойына ой қосып, көкейлеріндегі сауалдарына жауап берген тағылымды кездесуде студенттердің белсенділігінен байқалды. Сондықтан ұйымдастырушылар спикерлер мен қатысушыларға ерекше алғыстарын білдірді.